Səfillər

Katorqadan qaçan Jan Valjan özünə tamamilə yeni və dürüst bir həyat qurmağa çalışır. Vaxtilə sadəcə bir tikə çörək oğurladığı üçün cəzalandırılan bu adam indi qisas və haqsızlığın hökm sürdüyü cəmiyyətdə xeyirxah biri olmaq üçün mübarizə aparır.

İllər sonra o, böyük uğurlar qazanaraq şəhər meri vəzifəsinə yüksəlir və vəfat etmiş kimsəsiz qadının qızı Kozettanı himayəsinə götürür. Lakin keçmiş məhbusun bu cür yüksəlişi ilə barışmaq istəməyən müfəttiş Javer sakit həyata imkan vermir və onu ömürlük dəmir barmaqlıqlar arxasına göndərmək üçün təqibə başlayır.

Fransa və Belçika istehsalı olan «Les misérables» («Səfillər») filminin rejissoru Fred Kavayedir. 2026-cı ilin bu dramatik ekran əsərində baş rolları Vensan Lendon, Tahar Rahim, Kamill Kotten və Benjamin Lavern canlandırır.