Bask

Basklar ölkəsində ard-arda problemlərlə üzləşən 35 yaşlı Mikel həyatını dəyişmək qərarına gəlir. İşini və sevgilisini itirən gənc, yalnız internet vasitəsilə əlaqə saxladığı uzaq qohumu Çelonun dəvətini qəbul edir. O, hər şeyə yenidən başlamaq ümidi ilə Argentinanın ucqar bir qəsəbəsinə yola düşür.

Gözləntilərin əksinə olaraq, əmisinin qumarbaz və içki düşkünü olduğu, qonağına kömək edə bilməyəcəyi məlum olur. Həmçinin bu yaşayış məntəqəsi vaxtilə köçüb gəlmiş baskların nəsillərindən ibarətdir və onlar tarixi vətənlərinin ənənələrinə qeyri-adi dərəcədə bağlıdırlar. Mikelin bask dilində oxuduğu mahnını eşidən yaşlı Doloresin uzun illər davam edən letargik yuxudan ayılması və onu rəhmətlik qardaşı zənn etməsi vəziyyəti daha da qəlizləşdirir.

«El vasco» komediya-dram filmi rejissor Xabi Elortegi tərəfindən lentə alınıb. İspaniya və Argentina birgə istehsalı olan bu ekran işi 2022-ci ildə işıq üzü görüb. Əsas rolları Joseba Usabiaga, Eduardo Blanko, Ines Efron və Itziar Aizpuru canlandırıblar.