Adam

Abla Mərakeşin Kasablanka şəhərində kiçik ev çörəkxanası işlədərək səkkiz yaşlı qızı Varda ilə birgə yaşayır. Bir gün onların qapısını Samiya adlı gənc qadın döyür. Hamilə olan bu gənc qadının nə qalmağa bir yeri, nə də dolanmaq üçün bir işi var.

Balaca Varda yad qadına dərhal isinişsə də, Abla əvvəlcə onu evinə buraxmaq istəmir. Lakin Samiyanın mətbəxdə göstərdiyi bacarıq və bişirdiyi ləziz şirniyyatlar ev sahibinin fikrini dəyişir. Qadınlar arasında yaranan bu təsadüfi bağ onların münasibətlərini tədricən fərqli məcraya yönəldir.

«Adam» dram filminin rejissoru Məryəm Tuzanidir. 2019-cu ildə ekranlara çıxan ekran əsəri Fransa, Belçika və Mərakeşin birgə istehsalıdır. Filmdə əsas obrazları Lubna Azabal, Nisrin Erradi, Duae Belxauda və Əziz Xattab canlandırıblar.