Mükəmməl namizəd

Səudiyyə Ərəbistanında həkim işləyən Məryəm hər gün kişi pasiyentlərin qərəzli baxışları və həmkarlarının saymazyana rəftarı ilə üzləşir. Xəstəxananın qarşısındakı bərbad yolun təmir olunması xahişi isə rəhbərlik tərəfindən kobudluqla rədd edilir. Tibbi konfransda iştirak etmək üçün Dubaya yollanmaq istəyən gənc qadın hava limanında sənədlərinin vaxtının bitdiyini öyrənir.

Problemi yoluna qoymaq məqsədilə bələdiyyə seçkilərinə namizədləri qeydiyyata alan nüfuzlu qohumunun yanına gedən Məryəm onun qəbuluna düşmək üçün rəsmi müraciət forması doldurur. Təsadüfən atılan bu addım onun tamhüquqlu namizədə çevrilməsi ilə nəticələnir. Beləliklə, o, seçki kampaniyasına ciddi şəkildə qoşularaq xəstəxana yolunun asfaltlanmasını özünün əsas vədinə çevirir.

«Mükəmməl namizəd» dram və komediya filmi rejissor Hayfa Əl-Mənsur tərəfindən lentə alınıb. Almaniya və Səudiyyə Ərəbistanının birgə istehsalı olan bu ekran işi 2019-cu ildə təqdim edilib. Əsas rolları Mila Əl Zahrani, Dey Əl Hilali, Nora Al Awad və Xalid Abdulrahim canlandırıblar.