Livan səması

Ötən əsrin əllinci illərində gənc Alisa İsveçrəni tərk edərək günəşli və həyat dolu Livana yollanır. O, burada kosmosa ilk livanlı tədqiqatçını göndərmək arzusunda olan xəyalpərvər astrofizik Jozeflə tanış olur. Qısa müddət sonra aralarında yaranan məhəbbət Alisanın sevgilisinin ailəsinə doğmalaşmasına və burada məskunlaşmasına səbəb olur.

Cütlük uzun illər boyunca əmin-amanlıq və səadət içində ömür sürərək öz dünyalarını qurur. Lakin ölkədə baş qaldıran vətəndaş müharibəsi bu firavanlığı alt-üst edir. Silahlı qarşıdurmaların gətirdiyi fəlakətlər qəhrəmanların dinc yaşayışını dağıdaraq onları çətin sınaqlarla üz-üzə qoyur.

Fransa istehsalı olan «Livan səması» (Sous le ciel d'Alice) dram filmi 2020-ci ildə çəkilib. Ekran əsərinin quruluşçu rejissoru Xloya Mazlodur. Əsas obrazları Alba Rorvaxer, Vajdi Muavad, İzabel Ziqondi və Mariya Tannuri canlandırıblar.