Evə gedən yol

Şəhərdə bizneslə məşğul olan Yuşenq kənd müəllimi olan atasının dəfnində iştirak etmək üçün Şimali Çindəki doğma kəndinə yollanır. Anası Luo dəfn mərasiminin köhnə adət-ənənələrə uyğun keçirilməsini istəyir. Zəmanənin dəyişməsinə və insanların fərqli qaydalarla yaşamasına baxmayaraq, ana öz istəyində qətiyyətlidir.

Yuşenq anasının arzusuna hörmətlə yanaşır və onun bütün tələblərini yerinə yetirməyi qərara alır. Vida mərasiminə mərhum müəllimin yüzlərlə yetirməsi toplaşır. Bu izdihamı görən oğul atasının ən böyük arzusunu xatırlayır: atası onun kənd məktəbində uşaqlara dərs keçməsini istəyirdi. Şəhərə qayıtmazdan qabaq Yuşenq özünü müəllim kimi sınamaq qərarına gəlir.

«Evə gedən yol» (The Road Home) filmi rejissor Canq Yimou tərəfindən lentə alınıb. 1999-cu ildə Çində istehsal olunmuş dram və melodram janrlı bu ekran əsərində baş rolları Canq Tsıi, Sun Xunley, Cənq Hao və Yulian Jao canlandırıblar.