Gəlinlər

1922-ci ildə Amerikaya doğru hərəkət edən gəmidə müxtəlif insanların taleləri kəsişir. Kiçik Asiyadakı illərdən sonra ölkəsinə qayıdan amerikalı fotoqraf Norman Harris birinci sinif sərnişinidir. Həmin gəminin üçüncü sinfində isə Semadirek adasından olan dərzi qız Niki yol gedir. O, heç vaxt üzünü görmədiyi dərzi Prodromos ilə evlənmək üçün Çikaqoya yola düşüb.

Niki kimi yüzlərlə qadın agentliklər və kilsə təşkilatları vasitəsilə yad ölkəyə göndərilir. Onların çantasında yalnız toy libası və heç tanımadıqları gələcək ərlərinin fotoşəkilləri var. Fərqli təbəqələrə mənsub olmalarına baxmayaraq, uzun səfər zamanı Norman və Niki arasında sevgi münasibəti yaranır.

«Gəlinlər» adlı filmi yunan rejissoru Pantelis Vulqaris çəkib. ABŞ, Fransa və Yunanıstanın birgə istehsalı olan bu dramatik ekran əsəri 2004-cü ildə təqdim edilib. Əsas rolları Deymian Lyuis, Viktoriya Xaralabidu, Andrea Ferreol və Evi Saulidu canlandırıblar.