Maestro(lar)

Yaşlı və təcrübəli dirijor Fransua Dümar təqaüdə çıxmağa hazırlaşır, lakin onun oğlu Denis ilə münasibətləri illərdir gərgindir. Atasının yolunu seçərək eyni sənətə yiyələnən Denis ilə Fransua arasında daim peşəkar rəqabət hökm sürür. Günlərin birində Fransuaya zəng gəlir və ona məşhur «La Skala» teatrına rəhbərlik etmək təklif olunur. Yaşlı musiqiçi nəhayət ömürlük arzusuna çatdığını zənn edir.

Lakin böyük sevinc tezliklə gözlənilməz xəbərlə kölgələnir. Məlum olur ki, eyni soyada görə baş verən anlaşılmazlıq nəticəsində Milan teatrının dəvəti əslində ataya deyil, istedadlı oğul Denisə ünvanlanıb. Bu dolaşıq vəziyyət iki sənətkarın münasibətlərini yeni bir sınaq qarşısında qoyur.

«Maestro(s)» musiqili dram və komediya filmi 2022-ci ildə Fransa və Belçika tərəfindən birgə çəkilib. Ekran əsərinin rejissoru Brüno Şişdir. Əsas rolları İvan Attal, Pyer Arditi, Miu-Miu və Karolin Anqlad canlandırıb.