Kapitan Fantastik

Ben sivilizasiyadan uzaqda, meşənin dərinliyində altı uşağını təkbaşına böyüdür. Ata onların intellektual hazırlığına böyük diqqət yetirir: uşaqlar bir neçə dildə danışır, fəlsəfə, ədəbiyyat və kvant fizikasını öyrənir, Milad əvəzinə isə Noam Xomskinin doğum gününü qeyd edirlər. Bununla yanaşı, onlar əla fiziki formadadırlar, ova çıxmağı, ovladıqları heyvanı təmizləyib ocaqda bişirməyi bacarırlar.

Xəstəxanada yatan ananın intihar xəbəri ailənin sakit həyatını alt-üst edir. «Kapitan Fantastik» filminin qəhrəmanları onun dəfnində iştirak etmək üçün alışdıqları meşə mühitindən çıxıb böyük dünyaya doğru uzun bir yola çıxmalı olurlar.

ABŞ istehsalı olan dram janrlı bu ekran əsəri 2016-cı ildə rejissor Mett Ross tərəfindən çəkilib. Baş rolları Viqqo Mortensen, Corc Makkey, Samanta İsler və Annalisa Basso canlandırıblar.