Elan

Sadə bir qəzet elanı Annetin həyatını tamamilə başqa məcraya yönəldir. O, Overn bölgəsində təsərrüfatla məşğul olan fermer Polla tanış olur. Qısa müddətdə bu tanışlıq sevgiyə çevrilir və qadın oğlu Erik ilə birlikdə hər şeyi arxada qoyub kəndə, sevdiyi kişinin yanına köçməyə qərar verir.

Ana və oğul kənd mühitinə və təsərrüfat işlərinə gözlənildiyindən daha tez uyğunlaşırlar. Lakin bu gəliş heç də hamının ürəyincə olmur. Polun bacısı Nikol yad insanların onların həyatına daxil olmasına dözə bilmir və yeni gələnlərə qarşı açıq şəkildə düşmən mövqeyi tutur.

Fransa istehsalı olan «L'annonce» dram və melodram janrında 2015-ci ildə ekranlaşdırılıb. Filmin rejissoru Jüli Lopes-Kürvaldır. Baş rolları Alis Talyoni, Erik Karavaka, Klod Perron və Elen Vensan canlandırıblar.