Vətən

Sovet İttifaqının süqutundan və Litvanın müstəqilliyini bərpa etməsindən sonra Viktoriya doğma torpaqlarına qayıtmağa qərar verir. Arxada ABŞ-dakı iyirmi illik mühacirət həyatı və yeni bitmiş nikah qalır. O, səfərə Amerikada doğulub boya-başa çatmış on iki yaşlı oğlu Kovası da aparır.

Qadının əsas niyyəti atasından qalan mülkə sahib çıxmaq və həyatını yenidən qurmaqdır. Lakin ata ocağına çatdıqda vəziyyətin heç də asan olmadığı aydınlaşır. Yarıuçuq vəziyyətdə olan evdə artıq başqa bir ailə məskunlaşıb və onlar bu yeri tərk etmək fikrində deyillər.

«Vətən» (Gimtine) dram filmi rejissor Tomas Venqris tərəfindən lentə alınıb. Litva, Latviya, Almaniya və Yunanıstanın birgə istehsalı olan bu ekran əsəri 2019-cu ildə təqdim edilib. Əsas rolları Matas Metlevski, Severiya Yanuşauskayte, Darius Qumauskas və Barbora Bareykite canlandırıblar.