Oleg

Vətəndaşlığı olmayan pasport daşıyan latviyalı qəssab pul qazanmaq məqsədilə Belçikaya yollanır. İlk vaxtlar Oleg yerli ət kombinatında peşəsinə uyğun iş tapmağı bacarır. Lakin digər bir əmək miqrantı ilə düşən münaqişə onun qəfil işsiz qalması ilə nəticələnir.

Çıxılmaz vəziyyətə düşən gəncin qarşısına Andjey adlı bir polyak çıxır və ona rahat mənzil, yaxşı gəlir və yeni iş vəd edir. Çox keçmir ki, bu vədlərin yalan olduğu üzə çıxır və Oleg həmin adamın əlində əsl kölə vəziyyətinə düşür.

2019-cu ildə təqdim edilən «Oleg» dram filmi Latviya, Belçika, Fransa və Litvanın birgə istehsalıdır. Ekran əsərinin rejissoru Yuris Kursiyetisdir, baş rolları isə Valentin Novopolski, David Oqrodnik, Anna Pruxnyak və Quna Zarinya canlandırıb.