Dərədə dinclik

Rouds ailəsinin adi ərzaq alış-verişi gözlənilməz faciə ilə nəticələnir. Eşli həyat yoldaşı Con və on yaşlı oğlu Cessi ilə birlikdə yerli supermarketdə olarkən məkanda qəfil atışma başlayır. Con xanımını gizlətməyə müvəffəq olur, oğlunu və ətrafdakıları qorumağa çalışarkən silahlı şəxsin açdığı atəş nəticəsində həyatını itirir.

Ərinin yoxluğu ilə təkbaşına qalan Eşli dərindən sarsılır və övladı ilə birlikdə bu acı ilə yaşamağa səy göstərir. Bir müddət sonra onların qapısında Conun əkiz qardaşı Billi peyda olur. Onun zahiri bənzərliyi ailəyə yenicə baş vermiş kədərli anları durmadan xatırladır.

ABŞ istehsalı olan «Peace in the Valley» dram filminin rejissoru Tayler Riqqsdir. 2022-ci ildə nümayiş olunan ekran əsərində baş rolları Brit Şou, kiçik Maykl Ebbott, Dendri Teylor və Maykl Aaron Milliqan canlandırıblar.