Bilinməyən qadından məktub

1900-cü ilin yağışlı bir Vyana gecəsində tanınmış pianoçu Ştefan Brand tələsik əşyalarını yığmaq üçün evinə gəlir. Dava səbəbilə səhər tezdən baş tutmalı olan dueldən yayınmaq istəyən musiqiçi şəhəri gizlicə tərk etməyi planlaşdırır. Lakin nökəri Con ona poçtalyonun gətirdiyi qəribə bir zərf uzadır. Qadın xətti ilə yazılmış ilk cümlədə müəllif bu sətirlər oxunarkən artıq həyatda olmaya biləcəyini qeyd edir.

Ştefan məktubu vərəqlədikcə illər əvvəl cəmi bir neçə dəfə ötəri görüşdüyü bir qadının bütün ömrü gözləri önündə canlanır. Həmin qadın son nəfəsinə qədər pianoçunu böyük məhəbbətlə sevsə də, Ştefanın bu sonsuz bağdan heç vaxt xəbəri olmayıb.

«Letter from an Unknown Woman» melodramı rejissor Maks Ofyuls tərəfindən ekranlaşdırılıb. 1948-ci il istehsalı olan bu ABŞ filmində baş rolları Coan Fonteyn, Lui Jurdan, Madi Kristians və Marsel Jurne canlandırıb.