Ata

Serbiya əyalətində yoxsulluq içində yaşayan iki uşaq anası intihar edir. Yerli sosial xidmət orqanları isə dərhal uşaqları atalarından alır. Məmurlar hesab edir ki, sadə bir fəhlə olan Nikola ailəsini saxlamağa qadir deyil və ondan maddi vəziyyətini sübut etməyi tələb edir.

Uşaqlarını geri qaytarmaq üçün əlindən gələni edən Nikola yerli bürokratiyanın divarına çırpılır. Öz hüquqlarını qorumağın mümkünsüz olduğunu anlayan ata, son çarə kimi paytaxta üz tutur. O, birbaşa nazirlə görüşüb dərdi barədə danışmaq üçün Belqrada doğru piyada yola düşür.

2020-ci il istehsalı olan «Ata» dram filminin rejissoru Srdan Qoluboviçdir. Layihə Serbiya, Fransa, Almaniya, Xorvatiya, Sloveniya və Bosniya və Herseqovinanın birgə istehsalıdır. Baş rolu Qoran Boqdan canlandırıb, digər obrazlarda isə Boris İsakoviç, Nada Şarqin və Militsa Yanevski çəkiliblər.