Snu

1976-cı ilin yanvarında Fransişku Sa Karneyru ilə Snu Abekassis qarşılaşır. Fransişku gələcəyi parlaq görünən bir siyasətçi, inanclı katolik, beş uşaq atası və ailəli kişidir. Əslən danimarkalı olan Snu isə Vaşku Abekassislə evlidir, üç övlad böyüdür və "Don Kixot" nəşriyyatının rəhbəridir. Onun nəşriyyatı "Yeni dövlət" rejiminin senzurasına cəsarətlə qarşı çıxan müəlliflərin kitablarını çap edir.

Bu iki fərqli şəxs bir-birinə dərin hisslərlə bağlanır və nəticələrindən çəkinmədən sevgilərinə sahib çıxmaq qərarına gəlirlər. Onlar ictimai qınağa sinə gərərək həm şəxsi münasibətlərində, həm də ölkənin siyasi və sosial mühitində qarşılarına çıxan maneələri birgə aşmağa çalışırlar.

"Snu" tarixi dram filmini Portuqaliya rejissoru Patrisiya Sikkeyra lentə alıb. Ekran əsəri 2019-cu ildə işıq üzü görüb. Əsas rolları İneş Kaştel-Branku, Pedru Almendra, İniş Rozadu və Saymon Frankel canlandırıb.