The Mint

Valideynlərinin qəfil ölümündən sonra musiqi prodüseri Cey Fonteyn ailəsinə məxsus müstəqil hip-hop leyblının rəhbərliyini öz üzərinə götürür. Atasının qoyub getdiyi işi qorumaq və öz baxışı ilə inkişaf etdirmək üçün o, şirkəti Nyu-Yorka köçürmək qərarına gəlir.

Yeni şəhərdə biznes tezliklə maliyyə çatışmazlığı və dərin böhranla üzləşir. Şirkəti ayaqda saxlamaq üçün göstərdiyi səylər fonunda Cey yaxınlarından da getdikcə uzaqlaşır. İflas təhlükəsindən yaxa qurtarmaq istəyən gənc leybl üçün təzə və fərqli bir səslənmə axtarmağa məcbur qalır.

ABŞ istehsalı olan «The Mint» filmi həm dram, həm də komediya elementlərini birləşdirir. 2022-ci ildə çəkilən ekran əsərinin rejissoru Raymond Mamrakdır və o, layihədə həm də baş rollardan birini canlandırıb. Filmdə Cenni Farli, Eşli Kitinq və Kristiniya Debarc da çəkiliblər.