Zəfər marşı

Hərbi hissədə xidmət edən zabit Aşutto əsgərlərlə həddindən artıq qəddar rəftar edir, onları daima incidib alçaldır. O, evdə də eyni amansızlığı göstərir və sevgidən məhrum olan həyat yoldaşı ərindən gizlin digər zabitlərlə münasibət qurur.

Xidmətə yeni başlayan gənc əsgər Paolo Passeri kazarmadakı təzyiqlərlə barışmaq istəmir və mövcud qaydalara qarşı çıxır. Bu inadkarlıq yoldaşları ilə münasibətlərini gərginləşdirsə də, gözlənilmədən Aşuttonun rəğbətini qazanır. Qəddar zabit gəncə güvənərək ona xəyanətkar arvadını gizlicə izləməyi tapşırır.

«Zəfər marşı» dram filmi rejissor Marko Bellokkio tərəfindən lentə alınıb. İtaliya, Fransa, AFR və Monako kino ustalarının ortaq işi olan layihə 1976-cı ildə ekranlara çıxıb. Əsas rolları Franko Nero, Miu-Miu, Mikele Plaçido və Patrik Dever canlandırıb.