Məsihin bədəni

Həbsxanada mənəvi baxımdan dəyişən iyirmi yaşlı Daniel həyatını dinə həsr etmək niyyətinə düşür. Lakin keçmiş məhkumluğu onun rəsmi şəkildə keşiş olmasına mane yaradır. Azadlığa çıxdıqdan sonra əlinə düşən fürsətdən istifadə edən gənc özünü seminariya məzunu kimi təqdim edir və xəstələnmiş keşişin yerinə kiçik bir qəsəbə kilsəsini idarə etməyə başlayır.

Kilsə qaydalarını dərindən bilməyən Daniel xidmətlər zamanı səmimi və coşğulu çıxışları ilə kilsə əhlinin diqqətini cəlb edir. Baş vermiş ağır faciədən sonra bir-birindən uzaqlaşmış yerli camaat saxta keşişin sayəsində tədricən birləşir və təsəlli tapır. Bütün bunlara baxmayaraq, keçmişin izləri və söylənilən yalan onun həyatını çətin vəziyyətə salır.

«Məsihin bədəni» (Boze Cialo) dram filmi 2019-cu ildə Polşa və Fransa kinematoqrafçıları tərəfindən çəkilib. Rejissoru Yan Komasa olan ekran əsərində əsas rolları Bartoş Belenya, Aleksandra Koneçna, Eliza Rıtsembel və Tomaş Zentek canlandırıb.