Delibal

Memarlıq fakültəsinin tələbəsi Barış musiqi ilə nəfəs alır, zərb alətlərində çalır və gəncliyinin dadını çıxarır. Təsadüfən gördüyü bir qız onun düşüncələrini tamamilə dəyişir və gənc oğlan ilk dəfə həqiqi hisslərlə qarşılaşdığını anlayır. Həmin qızın nə adını, nə də ünvanını bilən Barış hər vəchlə onu tapmağı qarşısına məqsəd qoyur.

Nəhayət, o, Füsun adlı bu qızı tapır, lakin Füsunun bütün diqqəti təhsilinə yönəlib. Qız universiteti əla qiymətlərlə bitirib magistr pilləsi üzrə Amerikada oxumağı arzulayır. Barış səmimiyyəti və inadkarlığı ilə onun rəğbətini qazanmağı bacarır. Onlar evlənərək ailə qururlar, lakin nağıla bənzəyən bu münasibətin sevinci gözlənilməz sınaqlarla üzləşir.

2015-ci ildə Türkiyədə çəkilmiş «Delibal» filminin rejissoru Ali Bilgindir. Melodram janrındakı ekran əsərində əsas rolları Çağatay Ulusoy, Leyla Lydia Tuğutlu, Hüseyin Avni Danyal və Mustafa Avkıran canlandırıb.