Bənövşə satan qız

İyirminci əsrin əvvəllərində Madriddə gül satan və kiçik teatrda mahnı oxuyan Soledad adlı gənc qadın şəhərin böyük teatrı qarşısında kübar cəmiyyətin üzvü Fernando ilə rastlaşır. Onlar arasında qısa zamanda güclü sevgi hissi yaranır. Lakin tərəflərin fərqli ictimai təbəqələrə mənsub olması bu münasibətin rəsmi nikahla nəticələnməsinə mane olur.

Bir müddət sonra gənc ifaçıya teatrın əsas partiyalarından birini oxumaq həvalə edilir və onun istedadı dinləyiciləri heyran qoyur. Soledad qısa zamanda İspaniyanın ən tanınmış müğənnisinə çevrilərək dünya miqyasında qastrol səfərlərinə çıxır. Zənginlik və şöhrət qazansa da, daxilən tənha qalmağa davam edir və yalnız keçmiş sevgilisi ilə görüş onun qəlbinə rahatlıq gətirə bilər.

«Bənövşə satan qız» musiqili dram filmi 1958-ci ildə İspaniya və İtaliyanın birgə istehsalı kimi ekranlara çıxıb. Ekran əsərinin rejissoru Luis Sesar Amadoridir, baş rolu isə məşhur müğənni və aktrisa Sara Montiel canlandırıb.