Çörək və şokolad

Nino Qarofoli ailəsini maddi baxımdan təmin etmək ümidi ilə İsveçrəyə yollanır. Lakin yad ölkədə ayaqda qalmaq heç də asan deyil: yerli sakinlər gəlmələri qəbul etmir, iş yerləri uğrunda isə Türkiyə və İspaniyadan olan digər mühacirlərlə mübarizə aparmaq lazım gəlir. Uğursuzluqlar isə Ninonun addımbaşı qarşısını kəsir.

Onu qətl hadisəsində əsassız yerə şübhəli bilirlər, ardınca isə küçədə xırda qayda pozuntusuna görə xoşagəlməz vəziyyətə düşür. Beləliklə, nüfuzlu restoranda ofisiantlıqla başlayan karyerası kənd fermasında qeyri-qanuni fəhləliyə qədər geriləyir. Qəhrəman iflas edərək canına qıyan həmyerlisinə görə pullarını itirir, rəğbət bəslədiyi qadın isə isveçrəli biri ilə evlənir. Bütün bunlara baxmayaraq, Nino təslim olmur və sonadək mübarizəsini davam etdirir.

«Çörək və şokolad» (Pane e cioccolata) adlı 1973-cü il İtaliya filminin rejissoru Franko Bruzatidir. Əsas rolu Nino Manfredi ifa edib, digər rollarda isə Paolo Turko, Uqo D'Alessio və Tano Çimaroza çəkiliblər.