Sevgi

Ömürlərini birgə keçirmiş Jorj və Anna artıq səksən yaşını geridə qoymuş ahıl cütlükdür. Bir-birinə hər zaman dəstək olan bu ər-arvadın sakit günləri Annanın ağır xəstəliyə tutulması ilə sarsılır. Qadının əvvəlcə yaddaşı zəifləyir, daha sonra isə iflic nəticəsində bədəni hərəkət qabiliyyətini itirir.

Konservatoriyadakı müəllimlik işindən ayrılan Jorj bütün vaxtını həyat yoldaşına qulluq etməyə sərf edir. Kömək üçün tutulan baxıcılar xəstəyə lazım olan doğma münasibəti göstərə bilmədiyi üçün kişi hər şeyi öz üzərinə götürür. Zaman-zaman onlara baş çəkən yetkin qızları anasını qocalar evinə yerləşdirməyi tələb etsə də, ata bu təkliflə qətiyyən razılaşmır.

«Sevgi» (Amour) adlı dram filmi rejissor Mixael Haneke tərəfindən lentə alınıb. Fransa, Almaniya və Avstriyanın birgə istehsalı olan 2012-ci il ekran əsərində baş rolları Jan-Lui Trentinyan, Emmanuel Riva, İzabel Yüpper və Aleksandr Taro canlandırıb.