Les Tricheurs

Zavod sahibinin oğlu olan tələbə Bob təsadüfən Alen adlı avaraxasiyyət bir gənclə tanış olur. Yeni dostu onu cəmiyyətin qaydalarını rədd edən yaşıdlarının dairəsinə gətirir. Bu gənclər oxumaq və ya işləmək istəmir, günlərini xırda oğurluqlar və təsadüfi qazanclarla keçirirlər. Həmin bu qeyri-adi mühitdə qraf qızı Klo da vaxt keçirir.

Klonun təşkil etdiyi məclislərin birində Bob kirayə qaldığı otağın pulunu ödəməkdə çətinlik çəkən, lakin bahalı avtomobil xəyalı quran Miklə rastlaşır. Daim gecələməyə yer axtaran Alen isə şəhərdən gedən dostu Piterin mənzilinin açarını alır. Səhəri gün qapının altından içəri atılan 200 min frank və sirli bir görüş dəvəti hadisələrin gedişatını dəyişir.

1958-ci ildə ekranlara çıxan «Les Tricheurs» dram filminin rejissoru Marsel Karnedir. Fransa və İtaliyanın birgə istehsalı olan bu ekran əsərində əsas rolları Paskal Peti, Andrea Parizi, Jak Şarre və Loran Terziyeff canlandırıblar.