Əsas sevməkdir

Çəkiliş meydançasındakı təsadüfi tanışlıq fotoqraf Serve ilə aktrisa Nadini bir araya gətirir. Kişi erotik kadrlar çəkməklə dolanır, qadın isə uğursuz sənət karyerasının çətinlikləri ilə üzləşir. Nadini görən andan ona bağlanan Serve sevdiyi qadına dəstək olmaq üçün borca girərək teatr tamaşasında onun üçün baş rol alır.

Nadin həyat eşqini itirmiş ərinin yanında qalmaqla ona yeni ümid verən Serve arasında seçim etmək məcburiyyətindədir. Digər tərəfdən isə Serve düşdüyü təhlükəli mühitdən və borclarından xilas ola bilmir. Bu mürəkkəb münasibətlər zənciri qəhrəmanlardan birinin həyatına son qoyacaq acı bir sonluğa doğru irəliləyir.

1974-cü ildə ekranlara çıxan «L'important c'est d'aimer» filminin rejissoru Andjey Zulavskidir. Fransa, İtaliya və Qərbi Almaniyanın birgə istehsalı olan dramda baş rolları Romi Şnayder, Fabio Testi, Jak Dütron və Klaus Kinski canlandırıb.