Sonuncu film nümayişi

Kasıb məhəllədə yaşayan doqquz yaşlı Samay kinoteatra ilk gəlişində böyük ekranda gördüklərindən dərindən təsirlənir. Proyektordan süzülən işıq və hərəkət edən kadrlar uşağın qəlbində silinməz iz qoyur. Həmin andan etibarən onun bütün düşüncələri kino dünyasına bağlanır.

Balaca qəhrəman filmlərin hər gün onun həyatında olması üçün əlindən gələn hər şeyi etməyə hazırdır. O, kinodan ayrılmamaq naminə çətinliklərə sinə gərir və böyük arzusunun arxasınca addımlayır. «Last Film Show» dram filmi kinematoqrafiyaya vurulan uşağın bu səmimi həvəsindən bəhs edir.

Ekran əsəri 2021-ci ildə Hindistan, Fransa və ABŞ kinematoqrafçılarının birgə istehsalı ilə çəkilib. Filmin rejissoru Pan Nalin, baş rolların ifaçıları isə Bhavin Rabari, Bhaveş Şrimali, Dipen Raval və Riça Minadır.