28 gün sonra

Kembricdəki elmi mərkəzə daxil olan fəalların qəfəsdən buraxdığı meymun qan vasitəsilə dərhal yayılan dəhşətli aqressiya virusunu ətrafa yayır. Bu infeksiyaya yoluxan hər bir varlıq saniyələr içində amansız hücumçuya çevrilir. Cəmi dörd həftə ərzində xəstəlik bütün ölkəni cənginə alır və əhali təxliyə olunmağa çalışır.

Hadisələrin ən gərgin vaxtını xəstəxanada komada keçirən Cim gözlərini tamamilə boş qalmış Londonda açır. Nələrin baş verdiyini anlamaq üçün küçələri dolaşan gənc tezliklə yoluxmuşların qəfil hücumu ilə üzləşir. Onu qaçılmaz ölümdən digər sağ qalmış iki nəfər xilas edir.

2002-ci ildə ekranlara çıxan «28 Days Later...» filmi ABŞ və Böyük Britaniyanın ortaq istehsalıdır və eyniadlı franşizanın başlanğıcıdır. Triller, qorxu və dram janrlarını birləşdirən lentin rejissoru Denni Boyl, baş rol ifaçıları isə Killian Mörfi, Naomi Harris, Meqan Börns və Brendan Qlisondur.