İkiqat soyad

Səkkiz illik fasilədən sonra Vozdvijenskilər ailəsində Filip adlı oğlan uşağı dünyaya gəlir. Lakin bu çoxdan gözlənilən hadisənin sevinci uzun sürmür: ailə başçısı uşağın ondan olmadığını öyrənir. Evdən birdəfəlik getmək istəsə də, köməksiz qadına və körpəyə yazığı gəldiyi üçün bu addımı ata bilmir. Zaman keçdikcə o, uşağa dərindən bağlanır və onu öz doğma övladı kimi sevməyə başlayır.

Buna baxmayaraq, Vozdvijenski yoldaşının xəyanətini bağışlaya bilmir və nikah yalnız uşağın xatirinə davam edir. Beş ildən sonra münasibətlər tamamilə qırılır və qadın uşağın bioloji atasının yanına gedir. Valideynlər razılaşırlar ki, oğlan böyüdən atanın soyadını daşıyacaq və əsl həqiqəti yalnız bu kişilərdən biri dünyasını dəyişdikdən sonra öyrənəcək.

«İkiqat soyad» («Двойная фамилия») filmi 2006-cı ildə Rusiya və Qazaxıstan kinematoqrafçıları tərəfindən dram janrında ekranlaşdırılıb. Layihənin rejissoru Stanislav Mitindir, əsas obrazları isə Sergey Barkovski, Oksana Bazileviç, Oleq Ştefanko və Mariya Meşeryakova canlandırıblar.