Bəzən sevinc, bəzən kədər

Varlı iş adamı və həyat yoldaşı iki oğul böyüdür: övladlığa götürülmüş Rahul və doğma Rohan. Ailə başçısı böyük oğlunu ona aşiq olan rəfiqəsi Neyna ilə evləndirməyi planlaşdırır. Lakin Rahul kasıb məhəllədən olan sadə qız Ancaliyə vurulur. Atasına verdiyi sözü pozaraq onunla gizlicə ailə quran gənc ata qəzəbinə tuş gəlir və evi tərk edərək Londona köçür.

Aradan on il ötür və bu müddətdə böyüyən Rohan tamamilə dəyişərək idmançı görkəmli bir gəncə çevrilir. O, vaxtilə atası ilə qardaşı arasında baş vermiş münaqişənin əsl səbəbini öyrənir. Beləliklə, Rohan qardaşını tapıb yenidən ata ocağına qaytarmaq və parçalanmış ailəni birləşdirmək qərarına gəlir.

«Kabhi Khushi Kabhie Gham...» adlı musiqili dram filmi 2001-ci ildə Hindistan və Böyük Britaniya istehsalı kimi təqdim olunub. Layihənin rejissoru Karan Cohar olub. Əsas rolları Amitabh Baççan, Caya Bhaduri, Şah Rux Xan və Kacol canlandırıb.