Qadın işi

İkinci Dünya Müharibəsi dövründə Fransada yaşayan iki uşaq anası Mari Latur ehtiyac içində gün keçirir. Ailəsini dolandırmaq üçün o, gizli şəkildə qadınlara abort etməyə və otağını fahişəliklə məşğul olan tanışına icarəyə verməyə başlayır. Cəbhədən yaralı qayıdan ərinin varlığına məhəl qoymayan Mari tamamilə öz qayğıları ilə yaşayır.

Qanunsuz xidmətlər getdikcə ona xeyli gəlir gətirməyə başlayır və ailənin maddi vəziyyəti düzəlir. Pul qazandıqdan sonra darıxmağa başlayan Mari gənc bir sevgilisi ilə münasibət qurur. «Qadın işi» filmi müharibənin ağır illərində bir qadının atdığı addımları və dəyişən həyatını təsvir edir.

Fransa istehsalı olan bu tarixi dramı 1988-ci ildə rejissor Klod Şabrol çəkib. Əsas rollarda İzabel Yupper, Fransua Klüze, Mari Trentinyan və Nils Tavernye çıxış edirlər.