Mənim sevimli tortum

Tehranda tək yaşayan yetmiş yaşlı Mahin günlərini dörd divar arasında keçirir. Həyat yoldaşı dünyasını dəyişib, qızı isə daha yaxşı gələcək dalınca xaricə köçüb. Nəvələri ilə ancaq hərdən qısa videogörüntü vasitəsilə danışa bilir, lakin bu söhbətlər heç vaxt kifayət etmir. Qadının yeganə təsəllisi evə qonaq gələn tənha rəfiqələridir.

Yeknəsəq günlərdən bezən Mahin vərdiş etdiyi gəzinti yolunu dəyişərək fərqli addım atmaq qərarına gəlir. Küçədə hicabı düzgün bağlamadığı üçün əxlaq polisinin təzyiqinə məruz qalan gənc qıza arxa durur. Daha sonra isə tənha bir taksi sürücüsü ilə tanış olur və onu öz evinə dəvət edir.

«Mənim sevimli tortum» (Keyke mahboobe man) filminin quruluşunu rejissorlar Miriam Moqaddam və Betaş Saneiha verib. 2024-cü il istehsalı olan dramatik komediya İran, Fransa, Almaniya və İsveç kinematoqrafçılarının birgə layihəsidir. Baş rolları Lili Fərhadpur, İsmayıl Mehrabi, Mənsurə İlkani və Sürəyya Oranq canlandırır.