Sağ ol, oğlum

1990-cı illərin əvvəllərində Çində dövlət tərəfindən «bir ailə — bir uşaq» siyasəti qətiyyətlə tətbiq olunur. Metallurgiya zavodunda çalışan ər-arvad ikinci hamiləliyi gizlətməyə çalışsa da, məsələdən yerli komitə xəbər tutur. Təzyiqlər nəticəsində qadın abort etdirməyə məcbur qalır və bu tibbi müdaxilə onun bir daha ana olmaq imkanını əlindən alır. Qısa müddət sonra ailənin tək oğlu çayda boğularaq həyatını itirir.

Keçmişin ağrılarını geridə qoymaq istəyən cütlük dəniz sahilinə, Fujian vilayətindəki yad dialektli balaca bir şəhərə köçür. Onlar burada yetim bir oğlan uşağını övladlığa götürürlər. Lakin illər keçdikcə yeniyetməlik dövrünə çatan oğlan ailəyə qarşı üsyan edir və evdən qaçır.

«Di jiu tian chang» dram filminin rejissoru Van Syaoşuaydır. Çin istehsalı olan bu ekran əsəri 2019-cu ildə işıq üzü görüb. Baş rolları Van Tszinçun, Yun Mey, Tsi Si və Roy Van canlandırıb.