Həkim

Uğurlu cərrah Cek MakKi ən çətin əməliyyatları ustalıqla həyata keçirsə də, xəstələrinin keçirdiyi qorxu və ağrılara qarşı daim soyuqqanlı münasibət bəsləyir. Öz işində yüksək peşəkarlıq nümayiş etdirən həkim yad dərdlərə şərik olmağı heç vaxt vacib saymır. Lakin bir gün səhhətində yaranan problem onun rahat və firavan həyatını alt-üst edir.

Ona boğaz xərçəngi diaqnozu qoyulduqda, Cek səhiyyə sistemini bu dəfə həkim yox, adi və çarəsiz bir xəstə qismində görməyə məcbur olur. Xəstəxana divarları arasında yaşanan qorxu və çətinliklər onun dünyaya baxışını dəyişir. Artıq o, əvvəlki kimi laqeyd mütəxəssis olaraq qala bilməyəcəyini və xəstələrin nələr hiss etdiyini anlamağa başlayır.

1991-ci ildə ABŞ-da istehsal olunmuş «The Doctor» filminin rejissoru Randa Heynsdir. Ekran əsərinin baş rollarında Uilyam Hört, Kristin Lati, Elizabet Perkins və Mendi Petinkin çəkiliblər.