Qızıl buz

«The Cutting Edge» filmi bir-birindən tamamilə fərqli xarakterə malik iki idmançının taleyindən bəhs edir. Şıltaq və çılğın fiqurlu konkisürən qadın özünə yeni tərəfdaş axtarır, zədə səbəbindən karyerası yarıda qalan təkəbbürlü xokkeyçi isə idmana qayıtmaq üçün yeni şans qazanır. Hər iki idmançı cüt konkisürmə növündə Qış Olimpiya Oyunlarının qızıl medalını qazanmaq naminə bir araya gəlir.

Fərqli idman növlərindən gələn bu inadkar cütlük üçün məşqlər asan keçmir. Şəxsi ambisiyalar və qarşılıqlı narazılıqlar buz üzərində tez-tez mübahisələrə səbəb olur. Qələbə qazanmaq üçün onlar xarakterlərini cilalamalı və bir-birlərinə tam güvənməyi öyrənməlidirlər.

1992-ci ildə ABŞ-da çəkilmiş bu romantik idman komediyasına Pol Maykl Qleyzer rejissorluq edib. Baş rolları D.B. Suini və Moyra Kelli canlandırıb, digər rollarda isə Roy Dotris və Terri O'Kuinn çıxış edirlər.