The Lunchbox

Mumbayda nahar çatdırılması xidməti nadir hallarda yanılır, lakin bu dəfə qablaşdırılmış yemək tamamilə başqa bir adama çatır. Gənc evdar qadının əri üçün hazırladığı xörək təsadüfən təqaüdə çıxmağa hazırlaşan tənha bir mühasibin masasına gəlir.

Səhvi anlayan qadın növbəti dəfə qutunun içinə kiçik bir məktub qoyur. Qarşı tərəf ona cavab yazır və beləliklə, bir-birini heç vaxt görməmiş iki insan arasında qeyri-adi yazışma başlayır. Onlar hər gün səfərə çıxan yemək qutuları vasitəsilə daxili hisslərini, həyat qayğılarını və arzularını bir-biri ilə bölüşürlər.

«The Lunchbox» filminin rejissoru Riteş Batradır. Bu melodramda baş rolları İrfan Xan, Nimrat Kaur, Navazuddin Siddikui və Lillet Dube canlandırıb. Hindistan, Fransa, Almaniya, ABŞ və Kanadanın birgə istehsalı olan ekran əsəri 2013-cü ildə nümayiş olunub.