Ay atası

Gənc Məmləkət isti dənizkənarı kənddə atası və müharibədən ruhi xəstə qayıtmış qardaşı ilə birlikdə yaşayır. Doğmalarına ürəkdən bağlı olan bu qızın ən böyük həvəsi isə teatr sənətidir. O, aktyorları qeyri-adi insanlar sayır və bir gecə qastrola gəlmiş teatrın aktyoru kimi təqdim olunan naməlum şəxslə qarşılaşır.

Çox keçmədən Məmləkət hamilə olduğunu anlayır və bu xəbər ailəsini sarsıdır. Yaxınları ailə şərəfini qorumaq və camaatın qınağından qurtulmaq üçün doğulacaq uşağın atasını tapmaq qərarına gəlirlər. Beləliklə, bütün ailə həmin sirli teatr artistinin izinə düşmək üçün yola çıxır.

1999-cu ildə çəkilmiş «Ay atası» filminin rejissoru Bəxtiyar Xudoynəzərovdur. Almaniya, Yaponiya, Fransa, İsveçrə, Avstriya, Rusiya, Özbəkistan və Tacikistanın birgə istehsalı olan bu kinolentdə baş rolları Çulpan Xamatova, Morits Blyaybtroy, Ato Məhəmməcanov və Merab Ninidze canlandırıb.