American Fiction

Ədəbiyyat müəllimi və yazıçı Telonius «Monk» Ellison tədris metodlarına görə tələbələrlə anlaşa bilmir və universitetdən müvəqqəti məzuniyyətə göndərilir. O, təxminən on ildir əlaqə saxlamadığı ailəsinin yanına yollanır. Ailədə yaranan vəziyyət səbəbindən qocalan anasının bütün maddi xərclərini qarşılamaq öhdəliyi Monkun üzərinə düşür.

Əvvəlki kitabları oxucular arasında populyarlıq qazanmadığı üçün yazıçının təcili qazanca ehtiyacı yaranır. Müasir ədəbi mühitlə zarafatlaşmaq istəyən Monk təxəllüs arxasında gizlənərək afroamerikalılar haqqında saysız-hesabsız stereotiplərdən ibarət istehzalı bir roman yazır. Gözlənilmədən naşirlər bu əsərə inanılmaz dərəcədə böyük maraq göstərməyə başlayırlar.

«American Fiction» dram və komediya janrlarını birləşdirən ABŞ istehsalı tammetrajlı bədii filmdir. 2023-cü ildə ekranlara çıxan ekran əsərinin rejissoru Kord Ceffersondur. Əsas rolları Ceffri Rayt, Erika Aleksander, Sterlinq K. Braun və Lesli Aqqams canlandırıblar.