Təhlükəli əlaqələr

Valmon və Jülyettanın nikahı çox qəribə qaydalar üzərində qurulub. Həyatlarında daim kəskin hisslər axtaran bu ər-arvad kənar eşq macəralarını adi qarşılayır və təcrübələrini bir-biri ilə bölüşürlər. Onların aralarındakı yeganə qadağa isə həmin əyləncə vasitələrinə heç vaxt aşiq olmamaqdır.

Lakin xizək kurortuna səfər bu qaydanı darmadağın edir. Valmon orada rastlaşdığı gənc qadına qarşı idarəolunmaz hisslər keçirməyə başlayır və ona dəlicəsinə vurulur. Beləliklə, cütlüyün illərdir qoruduğu şərt pozulur və aralarındakı münasibət təhlükəli istiqamət alır.

1959-cu il istehsalı olan «Les liaisons dangereuses» filmini rejissor Roje Vadim lentə alıb. Fransa və İtaliyanın ortaq layihəsi olan bu melodramda baş rolları Jerar Filip, Janna Moro, Annett Vadim və Madlen Lambert canlandırıblar.