Yaşamaq icazəsi

Fransadan gələn Jorj Amerikada qalmaq hüququ qazanmaq, yerli sakin Bronte isə bəyəndiyi istixanalı mənzili icarəyə götürmək istəyir. Binanın qaydalarına görə bu mənzil yalnız ailəli cütlüklərə verildiyindən, heç vaxt bir-birini görməyən bu iki insan saxta nikaha girməyə qərar verir. Hər iki tərəf məqsədinə çatdıqdan sonra dərhal öz həyatına qayıtmağı planlaşdırır.

Lakin miqrasiya xidmətinin əməkdaşları bu tələsik evlilikdən şübhələnib geniş yoxlamaya başlayanda vəziyyət qəlizləşir. Rəsmi müsahibədən uğurla keçmək üçün onlar bir müddət eyni evdə qalmalı və bir-birinin xasiyyətini, vərdişlərini ən xırda detallarına qədər öyrənməli olurlar. Saxta cütlük məmurları inandırmaq üçün gerçək ailə rolunu oynamağa məcbur qalır.

«Green Card» filmi 1990-cı ildə rejissor Piter Uir tərəfindən lentə alınıb. ABŞ, Fransa və Avstraliyanın birgə istehsalı olan bu melodramda baş rolları Jerar Depardye və Endi Makdauell canlandırıb.