Bizalom

Nasistlərin işğalı altında olan Budapeştdə Katya adlı qadının adi həyatı gözlənilmədən alt-üst olur. Evinin astanasında ona ərinin Müqavimət hərəkatına qoşulduğu və gizləndiyi bildirilir. Həbs olunmamaq üçün o, bir daha evinə qayıda bilməz. Beləcə Katyanın həyatında gizli bir mərhələ başlayır: ona yeni ad və saxta tərcümeyi-hal verilir, həmçinin Müqavimət üzvü olan Yanoş adlı yalançı bir ər təyin edilir.

İki yad insan təhlükəsizlik xatirinə eyni evdə ər-arvad kimi yaşamağa məcbur qalır. Qapalı məkanda sıxıntı keçirən Katya əsəb sarsıntısı ərəfəsindədir. Sağ qalmaq üçün hər şeyə hazır olan Yanoş isə həddindən artıq ehtiyatlı, şübhəcil və soyuqqanlı davranır. Vəziyyətin çarəsizliyi və hər an yaxalanmaq qorxusu bu fərqli xarakterləri bir-birinə bağlayır və aralarında gözlənilməz hisslər formalaşır.

«Bizalom» dram filmi 1980-ci ildə Macarıstanda istehsal olunub. Ekran əsərinin quruluşçu rejissoru İştvan Sabodur. Əsas obrazları İldiko Banşagi, Peter Andorai, Oskarne Qombik və Karoy Çaki canlandırıblar.