Çay və rəğbət

On yeddi yaşlı Tom Li oğlanlar üçün nəzərdə tutulmuş qapalı məktəbdə oxuyur və yaşıdlarından xeyli fərqlənir. Teatra, musiqiyə və şeirə böyük maraq göstərən gənc nə idmanla məşğul olur, nə də qızlara diqqət yetirir. Anasının vaxtilə tərk etdiyi Tom sərt atasının tələblərinə cavab verə bilmir və sinif yoldaşlarının daimi istehzaları ilə üzləşir.

Yeniyetmənin çəkdiyi əzabları yalnız məktəb müəllimlərindən birinin həyat yoldaşı Lora başa düşür. Ərinin tələbələrlə vaxt keçirməsindən və müharibədə həlak olan ilk sevgisini unuda bilməməsindən əziyyət çəkən bu qadın bədbəxt bir evlilik yaşayır. Gəncin təcrid olunduğunu görən Lora ona əl uzatmaq və dayaq olmaq qərarına gəlir.

1956-cı ildə istehsal edilmiş «Tea and Sympathy» dram filminin rejissoru Vinsent Minnellidir. ABŞ istehsalı olan ekran əsərində baş rolları Debora Kerr, Con Kerr, Leyf Erikson və Edvard Endryus canlandırıb.