Qara buz

Helsinkidə ginekoloq işləyən Saara kənardan çox kübar, mülayim və özünə güvənən bir qadın təsiri bağışlayır. Lakin zahiri sakitliyin arxasında böyük bir sarsıntı gizlənir. Qadın təsadüfən öyrənir ki, həyat yoldaşı Leo gənc tələbə qız Tuuli ilə gizli eşq yaşayır.

İçini gəmirən qısqanclıq hissi ilə mübarizə apara bilməyən Saara fərqli bir yol seçir. O, ərinin sevgilisinə yaxınlaşmaq, onunla dostlaşaraq etibarını qazanmaq və bu gizli münasibətlərin bütün təfərrüatlarını öyrənmək qərarına gəlir.

«Musta jää» («Qara buz») triller filmi Finlandiya və Almaniya kinematoqrafçılarının ortaq işidir. 2007-ci ildə rejissor Petri Kotvitsa tərəfindən çəkilmiş ekran əsərində baş rolları Outi Mäenpää, Martti Suosalo, Ria Kataja və Ville Virtanen canlandırıblar.