İtaliyada hazırlanıb

Tanınmış londonlu rəssam Robert yetkinlik yaşına çatmış oğlu Cek ilə birlikdə Toskanaya yola düşür. Həyat yoldaşının vəfatından sonra miras qalmış qədim mülkü satmaq niyyətində olan ata və oğul burada çox vaxt keçirməyi planlaşdırmırlar. Onlar sadəcə xırda təmir işləri aparıb evi dərhal satışa çıxarmağı düşünürlər.

Lakin evin baxımsız vəziyyəti qəhrəmanları İtaliyada bir neçə gün daha qalmağa məcbur edir. Tikili üzərində birgə zəhmət çəkmək illərdir aralarında yaranmış soyuqluğu aradan qaldırmağa şərait yaradır. Beləliklə, divarları bərpa edən ata və oğul eyni zamanda bir-birləri ilə olan qopuq münasibətləri də qaydasına salırlar.

«Made in Italy» dram-komediya filmi rejissor Ceyms D’Arsinin rəhbərliyi altında çəkilib. Baş rolları Liam Nison, Maykl Riçardson, İolanda Kettl və Suad Fares canlandırırlar. Böyük Britaniya və İtaliyanın birgə istehsalı olan bu ekran əsəri 2020-ci ildə işıq üzü görüb.