İynəli qız

1918-ci ildə Kopenhagen şəhərində tikiş fabrikində çalışan Karolina müharibə dövrünün çətinlikləri ilə üzləşir. Cəbhədə itkin düşən ərindən ümidini kəsən gənc qadın imkanlı müdiri ilə münasibət qurur. Döyüşlər bitdikdən sonra tanınmaz hala düşmüş həyat yoldaşı geri qayıdır, lakin hamilə olan Karolina varlı sevgilisinin onunla evlənəcəyini düşünərək ərini qovur.

Evliliklə bağlı xəyalları puç olan qadın tezliklə işini də itirir və təkbaşına qalır. Çıxılmaz vəziyyətə düşən çarəsiz Karolina böyük bir iynə götürərək ictimai hamama yollanır və bətnindəki uşaqdan özü qurtulmaq qərarına gəlir.

«Pigen med nålen» dram filmi rejissor Maqnus fon Horn tərəfindən lentə alınıb. Danimarka, Polşa, Fransa, İsveç və Belçikanın birgə istehsalı olan bu ekran əsəri 2024-cü ildə işıq üzü görüb. Əsas rolları Viktoriya Karmen Sonn, Trine Dürholm, Besir Zeciri və Xoakim Fyelstrup canlandırıblar.