Marvinin otağı

Bessi və Li xaraktercə bir-birinə heç bənzəməyən iki bacıdır. Xeyirxah və fədakar Bessi ömrünü qoca, xəstə atasına qulluq etməyə həsr edib və ailənin bütün yükünü təkbaşına çiyinlərinə götürüb. Lakin gözlənilmədən onun özü də ağır xəstəliyə düçar olur. Özünə qapılmış və tez əsəbiləşən Li isə uzun müddətdir yalnız öz maraqlarını düşünərək yaşayır.

Li həm də on yeddi yaşlı oğlu ilə münasibətlərində ciddi böhran yaşayır və aralarındakı bağı bərpa etməkdə çətinlik çəkir. Bacısının xəstəliyi səbəbindən yaranan vəziyyət onları yenidən bir araya gəlməyə və illərdir yığılıb qalmış ailəvi problemlərlə üzləşməyə vadar edir.

ABŞ istehsalı olan «Marvin's Room» dram filmi 1996-cı ildə ekranlara çıxıb. Ekran əsərinin quruluşçu rejissoru Cerri Zaksdır. Baş rolları Meril Strip, Leonardo DiKaprio, Dayan Kiton və Robert De Niro canlandırıblar.