Danışın, mənə maraqlıdır

Həyat yoldaşından ayrılmasından yeddi ay keçən televiziya reportyoru Fransua Perren dərin böhran içindədir. Öz kədərli əhvalı ilə başqalarını narahat etmək istəməyən Fransua insanlarla görüşlərdən qaçır. Günlərin birində tənhalıqdan cana doyan kişi təsadüfi bir telefon nömrəsi yığaraq ünsiyyət qurmağa çalışır.

Dəstəyi qonşu uşağının ağlamaq səsindən yorulan aptek işçisi Kristina qaldırır. Beləliklə, iki tənha insan arasında telefon vasitəsilə mütəmadi söhbətlər başlayır. Üz-üzə gəlmədən danışmaq hər ikisinin ürəyincə olur, çünki bu yolla daxili komplekslərini gizlətmək xeyli asandır. Lakin zaman keçdikcə bu münasibətin sərhədləri dəyişir.

Rejissor Eduar Molinaronun çəkdiyi «Danışın, mənə maraqlıdır» filmi 1979-cu ildə Fransada istehsal olunub. Komediya və dram janrındakı ekran əsərinin baş rollarında Anni Jirardo, Jan-Pyer Maryel, Kristian Markan və Brijit Royuan çəkiliblər.