Sneqir

Dənizçilik məktəbinin tələbələri Nikita və Maksim təcrübə keçmək üçün «Sneqir» adlı balıqçı gəmisinə yola düşürlər. Təcrübəli dənizçilər gənclərin gəlişinə heç də sevinmirlər, çünki Barents dənizinin sərt sularında iki yeniyetməyə iş öyrətməklə yanaşı, onların təhlükəsizliyinə də daima nəzarət etmək lazımdır.

Gənclər komandanın ağır rejiminə və mürəkkəb xarakterlərinə uyğunlaşmağa çalışarkən balıq ovu gözlənilən nəticəni vermir. Şəraitin çətinləşdiyini görən gəmi kapitanı vəziyyəti dəyişmək üçün Norveçin ərazi sularına daxil olmaq barədə riskli qərar qəbul edir.

2023-cü il istehsalı olan «Sneqir» dram filminin rejissoru Boris Xlebnikovdur. Ekran əsərində baş rolları Makar Xlebnikov, Oleq Savostyuk, Aleksandr Robak və Timofey Tribuntsev canlandırıblar.