Həbsxana

Kino çəkilişləri zamanı rejissor Martin Qrundeyə keçmiş riyaziyyat müəllimi baş çəkir. Ağlını itirmiş qoca Şeytanın adından danışaraq rejissora maraqlı təklif irəli sürür: insanların öz əlləri ilə dünyada yaratdığı cəhənnəmdən bəhs edən ekran əsəri çəkmək. Martin bu fikri yaxın dostu olan jurnalist Tomas və onun xanımı ilə bölüşür.

Tomas bu mövzunu dövr üçün çox uyğun sayır və eşitdiklərini əsaslandırmaq üçün öz təcrübəsindən bir əhvalat danışır. O, nişanlısı və bacısı tərəfindən idarə olunan, bədənini satmağa məcbur qalmış gənc Briqitta ilə qarşılaşmasını xatırlayır.

«Həbsxana» adlı dram janrlı filmi 1949-cu ildə İsveçdə rejissor İnqmar Berqman lentə alıb. Əsas rollarda Doris Svedlund, Birqer Malmsten, Eva Henninq və Hasse Ekman çıxış edirlər.