Xoristlər

Uzun müddət iş tapa bilməyən musiqi müəllimi Kleman Matye nəhayət çətin tərbiyə olunan yeniyetmələr üçün internat məktəbində nəzarətçi kimi işə düzəlir. Fransa, 1949-cu il. Müəssisənin direktoru Raşan şagirdlərə qarşı amansız cəza üsulları tətbiq edir. Bu cür sərt qaydalar isə uşaqların daha da aqressivləşməsinə və qapanmasına səbəb olur.

Təbiətcə mülayim olan Matye bu cür haqsızlıqla barışa bilmir, lakin direktorla açıq mübarizəyə girməyə də çəkinir. Öz otağında bəstələdiyi musiqiləri gizlədən müəllim sonda fərqli bir çıxış yolu tapır. O, şagirdlərin diqqətini cəlb etmək və onlarla ümumi dil tapmaq üçün məktəbdə xor yaratmaq qərarına gəlir.

«Les Choristes» adlı musiqili dram filmi rejissor Kristof Baratye tərəfindən ekranlaşdırılıb. Fransa, Almaniya və İsveçrənin birgə istehsalı olan bu ekran əsəri 2004-cü ildə işıq üzü görüb. Əsas rolları Jerar Jünyo, Fransua Berlean, Kad Merad və Jan-Pol Bonner canlandırıblar.