Dünyanın Sonunda Sola Dönüş

1960-cı illərin sonlarında Hindistandan köçən yəhudi ailəsi səhranın ortasında yerləşən kiçik bir İsrail qəsəbəsinə gəlib çıxır. Yeni mühit və yerli fabrikin monoton işi onların gözləntilərini doğrultmur, üstəlik qəsəbədəki Mərakeş mənşəli sakinlər də gələnlərə soyuq yanaşırlar. Fərqli adət-ənənələrə malik bu iki icma arasında təmas qurmaq çətinləşir və ən xırda anlaşılmazlıq belə açıq narazılıqlara yol açır.

Böyüklər arasındakı gərginliyə baxmayaraq, fərqli ailələrdən olan iki gənc qız dostlaşmağı bacarır. Müəlliminə qarşı hisslər bəsləyən və anası ilə yola getməyən Nikol macəra axtarışındadır, ədəbiyyata maraq göstərən Sara isə atasını nümunə seçərək hekayələr yazır. Qızlar bir-birinə güvənib sirdaş olduqca, hər iki ailənin daxilində gizli qalan ciddi problemlər baş qaldırır.

«Dünyanın Sonunda Sola Dönüş» filmi rejissor Avi Neşer tərəfindən ekranlaşdırılıb. İsrail və Fransanın birgə istehsalı olan bu dram 2004-cü ildə nümayiş olunub. Baş rolları Neta Qarti, Liraz Çarxi, Or Atika və Jan Benqiqi canlandırıblar.